الإعدادات الأولية: جهّز واتساب وتليجرام والرد الذكي في تمام

لو البيانات الأساسية بتحدد شكل المنهج والمراحل جوه تمام، الإعدادات الأولية هي اللي بتفتحلك قنوات التواصل الحقيقية مع طلابك وأولياء أمورهم — واتساب، تليجرام، والرد الذكي اللي بيوفر عليك وقت الرد اليدوي.

في المقال ده هنشرح الأساسيات اللي محتاج تبدأ بيها، وهنتكلم بعدين في مقال منفصل عن الإعدادات المتقدمة.

من تبويب "إدارة واتساب" في الإعدادات:

1. دوس "إضافة جلسة".
2. اختار طريقة الاتصال. ننصحك تستخدم بروكسي خاص بيك بدل "اتصال مباشر" — الاتصال المباشر بيطلع من سيرفر تمام اللي بتشاركه سناتر تانية كتير، وده بيزوّد احتمال إن واتساب يشك في الرقم ويقفله. البروكسي الخاص بيخلي اتصالك يطلع دايمًا من مكان ثابت ومخصص لرقمك بس، وده أأمن بكتير على المدى الطويل. سيب "اتصال مباشر" كحل مؤقت بس لو حصل عطل في البروكسي بتاعك.
3. دوس "إنشاء الجلسة" — هتظهرلك جلسة جديدة في القايمة.
4. لما تبقى حالتها "امسح الكود"، هتلاقي QR — افتح واتساب على موبايلك، روح الأجهزة المرتبطة، وامسح الكود.
5. لما تتوصل، الحالة هتتغير لـ**"شغالة"** وتقدر تبعت وتستقبل رسايل من خلالها.

كل جلسة واتساب عندها زرار "ربط AI" بجانبها. لما تدوسه:

1. فعّل "تفعيل خدمات VSS للذكاء الاصطناعي".
2. حط API key بتاعك — ده المفتاح اللي بتاخده وقت تفعيل حسابك في تمام، وهو نفس المفتاح اللي هتستخدمه في أي مكان تاني عايز الذكاء الاصطناعي يشتغل فيه (زي إعادة صياغة رسايل الحملات، أو بوت تليجرام).
3. تقدر تظبط عدد رسايل السياق (كام رسالة قبل كده الـAI يقرأها عشان يفهم سياق المحادثة)، وتكتب System prompt خاص لو عايز.
4. دوس "حفظ".

الحدود (زي عدد الردود المسموح بيها) بتبقى مرتبطة بالمفتاح نفسه من شركة VSS، مش حاجة بتظبطها من جوه تمام.

غير الـAI، كل جلسة واتساب فيها زرار منفصل اسمه "ضبط الحدود" — ده بيتحكم في عدد الرسايل اللي ممكن تتبعت في الساعة وفي اليوم من الرقم ده (الافتراضي 12 رسالة في الساعة و60 في اليوم، وتقدر تغيرها).

الهدف إنك تحمي رقمك من إن واتساب يعتبره سبام ويوقفه.

من تبويب "جلسات تليجرام":

1. اكتب اسم الرقم (زي "main")، رقم التليجرام، والـحد اليومي للإرسال.
2. دوس "إضافة رقم".
3. دوس "إرسال كود" — تليجرام هيبعتلك كود على نفس الرقم.
4. دوس "إدخال الكود"، واكتب الكود اللي وصلك. لو حسابك عليه تحقق بخطوتين، هيطلب منك كمان كلمة مرور التحقق الثنائي.
5. دوس "تأكيد التسجيل" — الحالة هتبقى "جاهز" وتقدر تبعت من خلاله.

من تبويب "إعدادات الإشعارات" بتحدد لكل نوع تنبيه (زي حملة غياب، تذكير حصص، نتيجة امتحان...) حاجتين:

• القنوات المسموح بيها — واتساب، تليجرام، SMS، أو Web Push.
• ترتيب المحاولة — لو القناة الأولى فشلت (مثلاً واتساب مقفول)، النظام يحاول القناة اللي بعدها تلقائي.

كده بتضمن إن كل تنبيه يوصل لصاحبه بأي طريقة متاحة، من غير ما تتابع بنفسك واحدة واحدة.

الإعدادات دي كفاية عشان تبدأ تستخدم تمام بكل قنواته. فيه إعدادات متقدمة تانية (زي بوت تليجرام الإداري وإعادة صياغة رسايل الحملات بالذكاء الاصطناعي) هنشرحها في مقال منفصل بعد كده.